Wednesday, April 22, 2020

රතු රෝස මල්



රතුපාට ඇඳගත්ත 
රතු රෝස මල් වලට 
කළු පාට වහගත්ත 
කහ පාට මී මැස්සො 
සිත් පාට තවරන්න 
නෙක පාට කවි කියනවා 

Thursday, December 12, 2019

තොරොම්බල් සමනල්ලු

වරා මල් වගේ පියාඹා යන
තොරොම්බල් සමනල්ලු.....
ඉංගිරිසි මිනින්දෝරුවෝ තමයි
දඩබ්බර බත්කුරෝ....
හැමදාම මැරෙන අහිංසක පොරවල්
තමයි මී මැස්සෝ ...



Monday, September 30, 2019

රුපු යුද්ධයකි නුඹ සහ මා අතර,
ඉවසුම් අමෝරා ලතැවුල් හී පහර මාන්නා
රණ පිටිය සකසා
හිස් බෙලෙක් කදන් වටකොට
සද්ධන්ත ගිරිහිස මත මඟ බලා සිටින නුඹ.....

දන්නවානම් මා නොඑන වග 
යුධ සැමරුම්ය අද ,
පුරවරම ඔල්වරසන් හඬ මැද ..


Wednesday, February 20, 2019


    සුළඟ අනවරතය

හෙතෙම නිසොල්මන්ය......
හිදිමි විඳිමි...
සිහින දෝ දකියි
කප්පරක් අඬ අඳුර බිද
අතරින් පතර දැල්වෙන නියෝන් එළි,
එක පාර කෑ ගහන කොන්ක්‍රීට්
රෑබදුලු ස්වර.....

නීරස කරයි සිත,
නිවා අහවරක් කල පෙම් පවත්
හෙමි හෙමින් දැල්වින ආයෙමත්...
දවා ගත් සිගැරැට්ටුව....
නිවා ගත් ප්‍රේමය.......

පිට අත්ල මත වැටුණු
ඇවිලුනු අළු
විසිරින
අනවරත සුළඟට......



Wednesday, September 19, 2018



මුකුලිතවි මහ රැයට නිදිවදින විහඟුනේ....
විකසිතවි මහ රැයට
මල් තෙමන පිනි බිදේ....
ඇයත් අද නිදි නැතිව දෙගොඩහරි යාමයේ....
ෆැක්ටරියේ වැඩගොඩක් ගොඩගැහී මයේ හිතේ.....

වැහිදියේ හෙලෙනු මැන පිනි බිදක් නිදහසේ
වැටෙනු මැන පිනි බිදේ කුරුළු යහනාවතේ..

විහඟ, හනික නුඹ අවදි වී.....
සරනු මැන ඒ යහට මහ රෑම කළුවරේ....
සඳ එළිය නුඹේ නමට එළියදෙයි හිතවතේ...
තනි නොවනු නුඹේ ළගින් රැදෙයි ඒ පිණි බිදේ....

ගොහින් නුඹ ඇය අසළ රැදී මොහොතක් මලේ...
හෙලණු මැන පිණි බිදුව සෙමින් ඇගේ මුව වටේ.....




Thursday, June 28, 2018

නුඹ සොයා ගත් මොණර කොළයක් මා ගෙවා දැමු මතක පදයක්


සරා සද අභියසක
නුරා පහසක පැතුම
මලානික අහස යට
සේවූ සිසිවන සුවදක මහිම.......

වරා මල් සිතක් යට
කෙලෙස සොයමිද සෙවන මම
මවා ගත් ප්‍රේමයක
වින්ද සිත් කවිය නුඹ.....

ඇහෙන් ඉගිකර පහස ගැන
ගයන්නේ අනුරාගි ස්වර නුඹ
තනන්නේ රෙසි කලාවන් ළැම
සරන්නේ ඇට මිදුලු නහර වල.....


අතැගිලෙන් තද කරපු මස්පිඩු
මතක් කෙරුවා ජීවිතේ වග
මේ නුඹයි සහ ඒ මමයි බව...

හීන් කිතියක් හදවත අසළ
අහෝ නෑ ඒ වෙදානාවක්
නුඹ සොයාගත් මොණර කොලයක්
මා ගෙවා දැමු මතක පදයක්......




Monday, November 20, 2017

නව රාජ්‍යක් ලෙස නුතන ශ්‍රී ලංකාව


කාලය බොහෝ දෑ වල තීරකයා වනුයේ සැබවින්ම තමන්ට හිමි එතැනමය යන්න නැවත නැවත ලෝකයාට ප්‍රත්‍යක්ෂ්‍ය කරන රාමුවක් තුළය. එකී රාමුව අභිබවා ස්වකිය ජිවිත මෙන්න ඉන් පරිභාහිර ලෝකය හස්තයට අරගෙන අල්ලේ නටවන්නට යත්න ධරණ නුතන මිනිසා ගේ වෑයමේ අඩු වැඩිය කොතරම්ම බොළද, ලාමක ප්‍රයත්නයක් දැයි වැටහෙනුයේ ඉදහිට ස්වභාවදර්මයා හෝ විශ්වීය ප්‍රපංචයන් අප වෙත මුදා හරින නොරිස්සුම් සහගත හැඩතල නිසාය. රතු ඉන්දියානු නායක සියැටල් කී විදිහට “මිනිසා යනු පරිසරයේ කොටසක් මිස පරිසරය යනු මිනිසාගේ කොටසක් නොවේ. අප ආරක්ෂකයෝ මිස අයිතිකරුවෝ නොවේ”.
කෙසේ වෙතත් විශ්ව ගම්මාන සංකල්ප, උග්‍ර ධනවාදය, සමාජවාදයේ හුදු සටන් පාට, ලෝක බලවතුන්ගේ ක්‍රියාකාරිත්වයන් අන්තර්ජාතික සංවිධාන මේ සියල්ලම මිනිස් සමාජීය පරිසරයේ නුතනයේ තීරකයන් වී හමාරය. එහෙව් වටපිටාවක් තුළ අප අපටම යායුතු ගමන තීරණය කිරීමට හැකිද යන්න නිරායාසයෙන් ගොඩ නැගෙන ගැටලුවකි. අවශ්‍යතාවයක් තිබුනත් එසේ සිදු කරන්නට බැරි තැනක අප හිරවී ඇත. අප පමණක් නොව සමස්ත ලෝකයම එකම දම්වැලක යදම් මෙන් එකිනෙකට එකිනෙකට බැදී ඇත. ඒ බැදීම තුළ “ශ්‍රී ලංකාව නමැති මේ දුප්පත් රටේ ක්‍රියාකාරිත්වය මෙන්ම දායකත්වය අතිශය තීරණාත්මක වනුයේ මේ සමස්තය තුළ අප රෝලක් ගැසිය යුතු නිසාය.කතාව සරලවම කිවහොත් මෙලෙසය.
පහළොස්වන, දහසයවන සියවස් වල බොහෝ අපරදිග රටවල් වල දේශ ගවේෂණ කටයුතු පුළුල් වීමත් ඔවුන් ආසියාව, අප්‍රිකාව මෙන්ම ලතින් ඇමරිකානු කලාපයේ යටත් විජිත සොයා යෑමට විවිධ හේතු පාට ඇතිව මෙම ඉසව්වලට යාත්‍රා කළ නිසාත් එම කලාප වල යටත්විජිත පිහිටවා ගැනීමට ඔවුනට හැකියාව ලැබිණි. එලෙස පිහිටවාගත් යටත් විජිත වල පාලනය ඔවුන්ට අවශ්‍ය ආකාරයට ගෙනගිය අතර තම ආගම් ප්‍රචාරණය මෙන්ම එම රට වල ව්‍යාපාර කටයුතු කිරීම ආදිය සාර්ථකව කරන ලදී. කෙසේ වෙතත්  විසිවන සියවසේ මුල්භාගයේ සිට යටත් විජිතවාදය දියාරු සංකල්පයක් වෙන්නට පටන් ගත් වකාවානුවක මෙම බ්‍රිතාන්‍යය, ස්පාඤ්ඤය, ඕලන්දය ආදී රටවල් තම යටත් විජිත අතහැර යාමට පටන් ගත්තේය. එලෙස ඔවුන් එම රටවල් වලට නිදහස ලබා දෙන විට සියවස් ගණනාවක් යටත්විජිත මානසිකත්වයෙන් ජිවත් වූ මෙම රටවලට එය අමුතුම උත්තේජනයක් විය.
කෙසේ වෙතත් මෙම රාජ්‍යයන් ලෝක ප්‍රවාහයට සෘජුවම එසේත් නැත්නම් සක්‍රියවම සම්බන්ධ වන්නේ මෙතැන් සිටය. ආර්ථික වශයෙන් අසංවර්ධිත, දේශපාලනික වශයෙන් නවීකරණය නොවුණු එමෙන්ම සමාජීය වශයෙන් බහුවිධතාවයේ කොටස් කරුවන් ව සිටින මෙම රාජ්‍යයන් “නව රාජ්‍යයන් විය”. තවමත් තම රටට ගැලපෙන දේශපාලන ක්‍රමය අත්හදාබලමින් සිටින බොහෝ නව රාජ්‍යයන් ක්‍රියාත්මක වනුයේ විදේශ රටවල ආධාර මතින්ය. විදේශ රටවල්, සංවිධාන ණය ලබා දෙන තරමටම ඔවුන්ගේ ඇතැම් රෙගුලාසීන් වලට එකගවිමට මෙම රාජ්‍යයන් බැදී සිටි. ඒ පුද්ගලිකරණයයි. රාජ්‍ය යාන්ත්‍රණයේ පවත්නා දුර්වලතාවයන් මෙම රටවල් වලට පොදු අතර කෙසේ වෙතත් ඇතැම් රටවල් යටත්විජිත භාවයෙන් මිදුන සැනින්ම දීර්ග කාලීනව තම රටට ගැලපෙන ආණ්ඩුක්‍රම ව්‍යවස්ථාවක් නිර්මාණය කරගන්නා ලදී. ඉන්දියාවේ අම්බෙඩ්කාර් නිර්මාණය කළ ව්‍යවස්ථාව අදටත් එහි සාර්ථකත්වය කියාපානුයේ, සිදුකර ඇති ඉතා අඩු සංශෝධන ගණන හේතුවෙන්ය. කෙසේ වෙතත් අපට තවමත් රටට සුදුසු සහ ගැලපෙන ව්‍යවස්තාවක්වත් නිර්මාණය කරගත නොහැකි වී තිබීම සෝචනීය තත්වයකි.
අවසාන වශයෙන් එක් දෙයක් නම් පැහැදිලිය 48 බ්‍රිතානයන් අපට නිදහස ලබා දී ගියත් අප නිදහස් වී නැත. ඔවුන් පසෙක තබා ගිය අවුල් වුන නූල් බෝලයක් නැවත අප රැගෙන නැවතත් අවුල් වියවුල් කරමින් පවතී. මතක තබා ගතයුතු කාරණාව වන්නේ දැනට අඩසියවසකටත් වඩා වැඩි කාලයක් ගෙවී ගොස් අවසාන බවය.


ගොස්තියාගේ අඩවිය

රතු රෝස මල්